пятница, 18 мая 2012 г.

Սիրո քառյակներ. պոեզիա...




Իմ ծույլ գրիչը բառեր է սփռում
Տողերին դատարկ.
Նա իմ անմեկին հոգին է բացում
և դուռը իմ փակ:
Խուճուճ տողերս դառնում են հանկարծ
Սիրո քառյակներ.
Քեզ եմ  նվիրում, քաղցր հուշ դարձած
Իմ անգի՛ն ընկեր
**********************************************************


Հուշի թելով ամուր հյուսված շղթաները քո կարոտի
Իմ աչքերից դաժանորեն քունս են խլում,
Եվ քո մասին մշուշապատ մտքերը խուլ ու սնոտի
Գիշերային լռության մեջ հույս են կռում…

                                           ***************************************************

Մի՛ մարիր գիշերվա մոմերը իմ,
Մի՛ ցրիր աղոտ մեղեդին այն հին,
Որ թանաքոտ էջերիս անավարտ
Դարձել է հուշով պարուրված հեքիաթ…
                                         *****************************************************

Կամացուկ հանգչող անուրջը իմ թաց
                     Մեռյալ քաղաքում
Լուսավոր հոգուդ փեղկերից անթափանց
                     Արև է խնդրում…
                                     **********************************************************

Կքել է ձյան տակ ճյուղը անպաշտպան
Եվ կոտրվում է ճիչով մեղսալից.
Վերջին օղակն է ծխի բարձրանում
Իմ սառած հոգու ելևէջներից…
                                       *********************************************************


Քամին է խաղում վարագույրի հետ
Եվ հափշտակում հոգիս ինձանից.
Լուսինն է երկչոտ աստղերն այն ստեղծում
Կորած երազիս փշուրներից…



                            **********************************************************

Գիտես` դրսում տաք է այնքան,
Իմ ներսում` քաոս անորոշ.
Մենության իմ միակ վկան
Պատերն են լուռ, մռայլ ու գորշ…
                             *******************************************************

Գիտեմ, որ հեռու ես դու,
Գիտեմ, որ էլ չես գալու,
Բայց անհույս իմ խավարում
Ես լոկ քեզ եմ սպասելու…
                           *****************************************************

Մի՛ ժպտա, մի՛ խոսիր, մի՛ նայիր,
Անշշուկ անցի՛ր, խնայի՛ր.
Անիմաստ խոսքերս մոլոր
Սառը հոգում մենավոր
Մի՛ արթնացրու, խնայի՛ր,
Իմ հոգում խարույկ մի՛ վառիր
Մի՛ ժպտա, մի՛ խոսիր, մի՛ նայիր…




Հեղինակ՝ Անի Մարգարյան

1 комментарий: